Sancta Maria Maior (1325)

Sancta Maria Maior

† In nomine Domini amen. Nos prior et capitulum Sancte Marie Maioris de Urbe, premeditantes devocionis affectum quem ad eandem basilicam Fransciscus Homodei abbas generalis dum vivens obtinebat quemque claris indiciis operum ostentavit, dignum decernimus ut ipsius Francisci vota ferventia quantum nobis ex alto conceditur integraliter exequamur. Idcirco hoc edicto valituro sanccimus et in perpetuum ordinamus, huic ordinacioni nostre venerabilis viri domini M. de Columpna, vicarii domini P. de Colunpna ac eiusdem basilice arcipresbiteri assensu et consensu pariter concurrente, ut in presenti cappella iusta sue extreme voluntatis ordinem beneficiatorum trinarius numerus perpetuus ordinetur; qui beneficiati per eum noviter ordinandi et successores eorum teneantur in cappella prefata pro anima ipsius Francisci, fratrum suorumque parentum missas diebus singulis celebrare, ac in ali‹i›s horis canonacis diurnis pariter et nocturnis ut ceteri beneficiati eiusdem basilice deservire; qui beneficiati recipiant de fructibus infrascripti casalis et vinearum tantum quantum alii beneficiati de fructibus dicte basilice percipiunt; item unam missam pro mortuis conventuabiliter celebrandam iidem canonaci teneantur semel in eadem cappella singulis mensibus facere celebrari et anniversarium annuale in die sui obitus modo simili decanta‹r›i. Hoc . . . . . . . . . . statutum decernimus ordinandum pro eo qui idem Franciscus ad Dominam nostram multa devoccione succensus quoddam casale positum extra portam Numentanam, qui olim ecclesie fuit Sancti Basilii et cum vineis positis extra citraque pontem predictum pro sua, fratrum parentumque suorum anima reliquid basilice supradicte, decernentes ut tres beneficiati predicti tantumdem de fructibus dicte basilice recipiant quantum ceteri beneficiati recipiunt annuatim. Et ut predicta ‹ad› effectum totaliter exequantur, statuimus ut nos et successores nostri hoc statutum ‹observent› et omnia supradicta iubemus et [exspectes ut] iurare teneantur tactis sacrosanctis Evangeliis perpetuo observare et facere inviolabiliter observari, item quod dictum statutum una cum ceteris dicte basilice in archivio perpetuo conscribatur. Amen. Facta anni Domini MCCCXXV [*].