Sanctus Laurentius in Lucina (1427)

Sanctus Laurentius in Lucina

Mille quadringentis Domini labentibus annis
viginti septem adiunctis, quo tempore pastor
Martinus quintus, prius Oddo a stirpe Columna,
ecclesiam ac populos tranquilla in pace regebat,
iustitia ac pietate simul qui froena superbis
imposuit virtute sua domuitque rebelles,
expulit invisos patria de sede tyrannos
raptoresque truces, peregrinis omnibus urbem
fecit iter tutum nec tempore tutius ullo,
castra, urbes, iura ecclesiae distracta per annos
ad dominum rediere suum et subiecta fuere,
urbs etiam Romana sui non parva recepit
incrementa nec unquam in tanta pace quievit,
Rothomagi pater et praesul venerandus ad urbem
Romuleam venit Rupe de Scissa Ioannes,
cardine apostolico domino decoratus ab ipso,
huius et ecclesiae titulo remanente priori
Rothomagi ecclesiae merito cognomine patri.
Iste domum quasi collapsam et prostrata ruinae
fundamenta videns – nam, ut prisca recensuit aetas,
unus cardineo antistes praeclarus honore
Anglicus haec olim fundasse palatia fertur –
ultro opus aggreditur templumque domumque cadentem
cuncta novans reparat partimque palatia templi
funditus instaurat sublataque iura redemit,
cui decus et meritae manent per saecula laudes [*].