Sanctus Silvester in Capite (1119)

Sanctus Silvester in Capite

† Quoniam columpna Antonini iuris monasterii Sancti Silvestri et ecclesia Sancti Andree, que circa eam sita est, cum oblationibus que in superiori altari et inferiori a peregrinis tribuuntur, longo iam tempore locatione a nostro fuit alienata monasterio, ne idem contingat actoritate [sic] Petri Apostolorum principis et Stephani et Dionisii et confessoris Silvestri maledicimus et vinculo ligamus anathematis abbatem et monachos: quicumque columpnam et ecclesiam locare vel beneficio dare presumpserit, siquis ex hominibus columpnam per violentiam a nostro monasterio subtraxerit perpetue maledictioni sicuti sacrilegus et raptor et sanctarum rerum invasor subiaceat et anathematis vinculo perpetuo teneatur, fiat. Hoc actum est actoritate episcoporum et cardinalium et multorum clericorum atque laicorum qui interfuerunt; Petrus Dei gratia humilis abbas huius sancti cenobii cum fratribus suis fecit et confirmavit anno Domini millesimo CXVIIII, indictione XII [*].