6 De regione Parionis et Sanctorum Laurentii et Damassi
De regione Parionis et Sanctorum Laurentii et Damassi, que est sexta regio urbis, dicendum est in presenti quod huiusmodi regio dicitur Parione a parte et leone, quia regio huiusmodi habet pro signo grifonem, leonis partem, coloris rubri [245], cuius extrema pars corporis in groppa, cauda et pedibus posterioribus instar leonis habet, licet caput, pectus et pedes anteriores ac alarum latera similitudinem habeant alitum, id est magnarum avium; qui de orientalibus partibus dicitur venisse divinitus [246] in quodam territorio finitimo urbi, quod Romano dyomate dicitur Grifi, castrum Columpne prope.
6, 2 Unde incole huiusmodi regionis dictum territorium accedentes eandem alitem duxerunt ad urbem in regione predicta. Et ista est ratio quare homines huiusmodi regionis in ipsorum vexillo portant pro signo grifonem rubeum [247], situm in campo albo [248]. [249]
6, 3 Secunda pars regionis eiusdem denominatur a nomine ecclesie sanctorum huiusmodi, quam beatus Damassus natione Yspanus et papa Romanus construxit in reverentiam dicti levite et sui nominis vocabulo titulavit.
