8 De regione Montium et Biberatice
De prima regione urbis que dicitur Montium et Biberatice - nam regio Montium dicitur a tribus montibus in ea sitis, quorum primus est Quirinalis, a Curibus appellatus [170], secundum Livium .I. Ab urbe condita c. VIII § ita geminata urbe (Liv. 1, 13, 5), secundus est Exquilius, nuncupatus ab esca alitum, id est avium, tertius est Celius, a celsitudine appellatus, additus urbi per Tullum Hostilium tertium regem Romanorum et populatus ex ruinis Albanis, secundum Livium .I. Ab urbe condita c. XVIII § Roma interim crescit Albe ruinis (Liv. 1, 30, 1).
8, 2 Biberatica vero dicitur a profunditate paludis, ubi Mectius Curtius Sabinorum princeps ex bello fugiens submersus est. Hodie locus in quo sita est dicta palus corrupto vocabulo dicitur Campus Carlei, id est Curtii, ubi cum profunde foditur terra, invenitur qualiter fuerunt aque paludis huiusmodi exsiccate. Et vocatur campus ille platea, secundum Livium I Ab urbe condita c. VIII dicto § ita geminata urbe (Liv. 1, 13, 5).
8, 3 De huiusmodi palude et aliarum aquarum venientium ex collibus ad convalles urbis eiusdem desiccatione et cloacis e fastigio in Tiberim ductis (Liv. 1, 38, 6) per Tarquinium Priscum quintum Romanorum regem scribitur plene per Livium .I. Ab urbe condita c. XXII, ibi: maiore inde animo pacis opera inchoata (Liv. 1, 38, 5).
8, 4 Cuius regionis signum sunt tres montes predicti, spericam formam habentes, coloris terrei sive silcei, siti in campo albo. Nonnulli Romani moderni ygnari ystoriarum Romanarum depingunt, et male, hodie huiusmodi montes colore viridi dicentes [171]: “Letatur multum viridi natura colore”; dicitur mons quasi magnum solum, id est alta terra eminens [172].
